Sajak jelema awam

Sajak Cinta

Ieu nu ngarana cinta téh?

sagala karasa.

                                                Andir, 14 April 2014 basa keur meujeuhna bogoh.

Hirup, hurip, ripuh

Aya alesan nu pasti naha urang dilahirkeun

aya alesan nu pasti naha urang kudu babanda

tapi euweuh alesana mun urang kudu sangsara.

Manéh nu maneuh

Hiliwir angin nu patinggugupay

ngajak ieu pikir kana waktu harita

harita

pasini jangji paheut asih kadeudeuh

disaksian ku bentang nu baranang

olohok semu sirik

bulan gé teu loba omong

émprak bari buburileukan dulak-delék

teu boga layan

pleng...

kumalayang ieu pikir

nyiang rasa nu teu puguh

kabayang jauh kalangkang katresna ti kaanggangan

duh manéh nu maneuh

naha bet kudu ngahimpit rasa muragkeun raheut

kaduhung...

                                keur ngalamun di kosan, nyorangan nginget-nginget mangsa katukang.

Galau

Poék mongkléng nu kacida

sora bueuk ngalanglayung

angin peuting mawa rasa teu merenah

nambah guligah

bulan leungit kahalangan mega

bentang indit sudi jadi saksi

ukur kalangkang fatamorgana

éta gé kalangkang urang

aya waé piceurikeuna dina lamunan

aya waé piambekeuna dina lamunan

aya ogé bungahna, ngan saeutik.

                                                                                Jatinangor, 20 April 2014

Begang

Ambekna alabatan durukan suluh ditambahan ban

lila ka pareumna teu beunang diubaran

garis beungeut geus kawas benang nyangsang

ngambay tapi pajuriwet

buuk tinggal dua lambar

kulit lanyod

begang jeung begung

ngalungsar, kapegung, eungap

tinggal tulang jeung nafsu.

Ucing

Alus rupa alus budi

dipikadeudeuh ku manusa

imut manja dihareupeun jelema

ditukangeuna cocokot sagala rupa

mun hayang hayang mun embung embung

munapék jiga si éta

atawa si éta nu siga ucing

Kalangkang

Urang cicing manéhna cicing

urang lumpat milu lumpat

ngudag taya anggeusna taya nepina

hésé ditéwak hésé dicarék

lir ibarat tugas nu sok ngalangkang sapopoéna.